شو في ازكى من رغيف خبز طابون سخن مع زيت و زعتر و حبيتين زيتون بلدي ؟
شو في أزكى من أقراص الجبنة و الزعتر و المناقيش و كعك القدس على اصوله مع بيض مسلوق ؟
لما ست ساحورية تحول طعم الغربة لطعم البلد ، من أول ما تفتح باب مخبزها تاخدك الريحة على بيت ساحور دغري !
ميسون ابوعيطة خوري ، هالست اللي حولت حلمها لحقيقة مع اول رغيف خبز عملتو ، ليكون مخبز holy land “الاراضي المقدسة” من أنجح المخابز الموجودة في منطقة فلنت / ولاية متشغن.
بعمل في المخبز بجانب ميسون ٤ اشخاص على مدار ٨ ساعات باليوم ، و منهم أختها مها أبو عيطة القزحة وهي المساعد الأكبر .
“طموحي ما رح يتوقف عند منطقة فلنت ، الهدف انو نوسع المحل و نصدر خبز و معجنات لولايات تانية ” بهالكلمات بلشت ميسون هالست الطموحة كلامها ، و كملت “رح نستورد منتوجات ابوعيطة من بيت ساحور متل المفتول و الرشتاية و نصدرها لكل عيلة بامريكا”.
و لما سألناها شو السر المميز اللي بأكلاتها ؟
قالت ميسون “كل المكونات اللي بحتاجها لصنع الأكل بشحنها من البلد متل البهارات الزعتر الأخضر و غيرو” .
وعن نجاح المخبز من أول يوم قالت ميسون ” دليل النجاح كثرة الطلب على منتوجاتنا ، الناس مشتاقة لأكلات البلد اللي قليل ما تلاقيها هون ، متل كعك القدس ، خبز الطابون ، و المعجنات ، وطبعاً النظافة و الاتقان في كل شغلة منعملها هي اللي بتخلي الناس ترجعلنا “..
و بالنهاية حكتلنا ميسون عن تأسيس المخبز : “استثمرنا جائحة كورونا بإيجابية و استغلينا الوقت لنرتب امور المحل ، و تم الافتتاح بشهر ٧ /٢٠٢٠ ” .
واحنا بدورنا من جمعية بيت ساحور usa منتمنى التوفيق والاستمرارية للأفضل لميسون وخالد خوري، ومنطلب من الكل يجربوا أكلات هالمخبز لأنو التجربة خير برهان